بقولكم مشكلتي مع اخواني و اهلي لاني انتهيت

عضو

AHD

السلام عليكم
شوفو بقولكم مشكلتي واتمنى انكم تساعدوني تكفون

انا فتاه متخرجه من الثانويه قسم تعبت من الحياه ليش مادري.

اولا من يومني صغيره كنت محافظه وكنت اخاف من ربي وكنت احس حق ربي والى الان حمدلله بس مادري بعض الاحيان
يجيني ابليس ويشككني في ديني والحين احس اني انتكست مرره صرت ماني محافظه ابداً ، وصار تقريباً كل شي عادي وأخر الصلاة وكل شي ماني مثل اول ابداً الله يهديني وش سبب انتكاستي مادري.

وشكيت في اهلي احس اهلي مو الي انا عايشه عندهم والله بعض الاحيان افكر اني اطلع من البيت اروح اي مكان ثاني بس وين اروح مدري والسبب في شكي في انهم اهلي كنت يوم في ابتدائي كانت اختي واخوي يقولون لي انك منتي اختنا وامك غير وحنا لقيناك وخذناك وقالولي كذا كم مره وانا صدق صدقتهم تخيلو معاد كلمت احد رحت ابكي وجتني امي منهبله علموها السالفه بس امي تسألني وش فيك ماقلتلها احسها مو امي خلاص حتى ماعاد اقدر اقول امي احس انها مو امي بس امي جت قعدت تكلمني وتقول والله يكذبون وانتي بنتي وقامت عاد تقول كلام كثير واخواني جو يضحكون يقولون نكذب عليك وقالو لو انتي مو بنتنا كان ماخذناك حنا كثيرين ومانحتاج احد وصدق اخواني كثيرين الي اكبر مني واحس انهم اهلي لاكن مدري وش فيني.

والحين يتذكروني يوم صغيره ويضحكون يقولون وشلون صدقتي ويضحكون وانا اضحك واسوي نفسي اني نسيت هذاك المقلب واقول منجد وشلون صدقت خبله انا وبعض الاحيان يجيني شك الحين وانا كبيره انهم صدق مو اهلي حتى دراستي صارت درجاتي صارت مره سيئه معاد احب المدرسه ابدا اعيي اروح والله بعض الاحيان يجي ابوي عندي يترجاني اروح
ويقول وش السبب مسوي لك احد شي وش صاير لك اقول ماصار شي وانا والله صادقه ماسوى لي احد شي وخلوني غصب اروح بس بعد مازعجهم والحين معي بنات خالاتي ثنتين كبري من يومني في ابتدائي وهم معاي وكنت انا اشطر وحده وكانو يكرموني مع الاوال وهم لا والحين انقلب الحال صارو هم اشطر مني وكانو امي وابوي متاملين فيني كثير اني بارفع راسهم كنت شاطره وذكيه واجتماعيه الحين معاد حتى اعرف اصادق والله يجوني البنات يبغون يصادقوني يلمحون لي وانا اتجاهلم واسوي نفسي مابيهم ويحسون اني مغروره ولا انا والله ابي اصادقهم بس مادري وش فيني صرت انطوائيه بقووه

حتى اهلي واقاربي يقولون وشفيك صرتي كذا معاد اسولف ولا اكلمهم زين يحسبوني مابغاهم وبدو يتركوني وان والله ودي بهم بس معاد اعرف حتى اتكلم معاهم زين اذا كلمني احد استحيي مره ليش مدري احس ماثق في نفسي ابداً

والحين ابي ارجع مثل اول ولا قدرت عندي اخوي والله احس بديت اكرهه كل ماسويت شي يجي يتلقف فيني ويسبني قسم احس راحت ثقتي في نفسي منه

احس الحين عايشه بدون اي هدف ومدري وش اسوي في الحياه وضايق صدري مره ودي اموت وارتاح من هاذي الدنيا مللليت قسم اسفه على الاطاله

تكفون الي عنده حل لي يقوله والله لادعيله لاني مرره ملييت صرت اكره تقريباً كل الناس حتى بعض الاحيان اكره امي وابوي ليش مدري؟


منذ 16-06-2020 - 5 تعليقات - الزيارات 459 | مشكلة نفسية

  

خبير

ابو تركي

منذ 16-06-2020

وعليكم السلام ورحمة الله

اختي اولاً بقولك شي قبل ما اعلمك الحل
انا تراني كنت مثلك شخص خجول واخاف من الناس ودايم افكر كيف اقابل الناس واكلمهم ولا اعرف ارد.

ولكن بعد توفيق الله والاردة والعزيمة لقيت الحل ...
تصدقين الحل والله بسيط وسهل ولكن حنا غافلين عنه .!
اولاً : انتي تدرين ان كل الناس يستحون ويخافون ومرات مايعرفون يردون بعد .!
ولكن الفرق بينك وبينهم انهم مايفكرون في المواقف الي تصير لهم وانتي تفكرين فيها وتقعدين تعذبين نفسك فيها وتشغلين مخك بس في هالافكار الفاشله مع انها مهي حل ولا لها فايده اصلن بس تجيبلك الهم والغم ..

الحل ..
اولا الصلاة الصلاةةة
صلي كل الصلوات في وقتها وعليك بالدعاء بالسجود اذا سجدتي قولي في اخرها يارب ارزقني قوى الشخصية وحببني في الناس وحببهم فيني ودعي كل شي في خاطرك

وعليك بالصلاة اخر الليل ركعتين ودعي الله بعدهم بلي تحسين فيه وتبينه انه يرجعك للناس ويشيل الافكار ذي عنك ، انتي يمكن فيك عين ولاشي شوفيلك مويه مقري فيها ولا زيت ادهني نفسك فيه ، وانسي الافكار ذي اذا جتك استغفري الله وتعوذي من الشيطان ونفثي عن شمالك ثلاث مرات ترى كل هالافكار ماتجي غير من الشيطان

لاعاد تجلدين نفسك في هالافكار تراك بخير ونعمه واهلك وامك وابوك يحبونك ويموتون فيك
والدليل امك دايم تحاكيك وتبيك ترفعين راسها وابوك بعد مثلها

هدي نفسك وكانك تسوين العاده السريه ابتعددددي عنها فوراً تراها هي تسبب كل المشاكل النفسيه في الانسان

واسال الله العلي العظيم ان يهديك ويحفظك ويشفيك ويخليك لأهلك وباذن الله كم يوم ولا اسبوع وتجينا هنا وتقولين ابشرك معاد فيني غير العافية

التوقيع

سبحان الله وبحمده سبحان الله العظيم


عضو

شووق

منذ 16-06-2020

السلام عليكم ياحبيبتي
اول شي انا حاسه فيك وحطيت نفسي بموقفك لاكن شوفي اول شي انتي قلتي قل تعلقك بالصلاه و قربك بربي صح؟عشان كذا تدرجت تحتها وسوسة الشيطان انهم مو اهلك وتدرج تحتها ان تهربين من البيت وتدرج تحتها انك تحسين اخوانك ضدك وتدرج تحتها الكثييير من المشاكل الحل هو بالبدايه لازم ترجعين تتقربين من ربي صلي الوتر وادعي دعاء اللهم يامقلب القلوب ثبت قلبي على دينك الله يحب العبد التواب كثيير الرجوع اليه واهلك واضح من كلامك انهم يحبونك خصوصاً امك وابوك كثييييير❤️❤️❤️❤️الله يحفظك ياربب فكري كثييير ب الإجابيه


عضو

Maram

منذ 16-06-2020

اهلاً
هذا موضع طبيعي ويمر على الكل ولكن من وين جات الفكرة الاولى وليش لازم تعرفين جذور المشكله وتراجعين نفسك وكذا اوك انو اهلك لانو اخوانك وانتي صغار لكن الدين ليش؟
بختصر عليك بكم نقطة
اول شيء تعرفين جذور المشكله وين بالضبط .
ثاني شيء تغيرين الافكار وتستمرين لمدة معينة مثلاً ٢٠ يوم ماتفكرين بهالموضوع وتشغلين نفسك ولما تجيك الفكرة على طول تجاهلينها.
ثالث شيء انا اقول تصارحين اهلك وتقولين لهم انا احس بكذا كذا .
رابع شيء ممكن تكلمين استشارية نفسيه تساعدك بهالموضوع .
اخيراً الاهم ترجعين لربي وتدعين وماتعطي الموضوع اهمية كبيرة وتقوين نفسك حتى لو ما احد اهتم لك وبس.

التوقيع

xx


مشرف عام

نجود

منذ 16-06-2020

وعليكم السلام ورحمة الله وبركاته
ماقصروا الاخوان والاخوات
ولكن اضيف عليه لازم تشوفين شيخ يقرا عليك وليس شرط فيكي شي خذيها عادة حبيبتي.
والله ان الواحده فينا تتعب نفسها في التفكير بالحل والدكاترة النفسيين والخرابيط
ونسينا اهم واقوى علاج وهو الصلاة والدعاء
والله ياقلبي ان الصلاة والدعاء حل لك ولي ولكل مريض
اكثري من الاستغفار والدعاء وصلاة الوتر وصدقيني انتي بنفسك راح تلاحظينه وتشوفين كيف بديتي ترتاحين ونفسك ترتاح وتروح عنك كل الهواجيس هذي

وباذن الله ماعليك الا العافية

التوقيع

خليك في البيت


نشيطة

الموناليزا

منذ 16-06-2020

وعليكم السلام ورحمه الله وبركاته
العمر مابعد الثانوي يعتبر عمر عدم استقرار وتفكرين باشياء كثيره..والافكار هذي من مداخل الشيطان تعوذي من الشيطان اولاً ثانيا ارجعي وحافظي على صلاتك واذ تبين الحل بااذن الله عليك بقراءه سوره البقره راح تحسين براحه وطمأنينه عجيبه سبحان الله...اما سالفه اخوانك وانتي صغيره وانك مانتي اختهم هذي كل الشعب مقيول لهم هذي الكلمه من باب يبونا نصيح ونبكي بس انتي الله يهديك راحت افكارك بعيد...الله يطمن قلبك ويخلي لك والديك والله يجعلك من البارين بوالديه


الاكثر اجابة

354

321

246

178

174

165

159

135

129

محول التاريخ